ديوان غزل هاي مير محمد نصير خان تالپور جعفري

ديوان غزل هاي مير محمد نصير خان تالپور ’جعفري‘ (ڪتاب): هي ديوان ٽالپرن جي آخري تاجدار مير محمد نصير خان ٽالپر ’جعفريءَ‘ جي فارسي غزلن جو مجموعو آهي، جنهن کي ايران جي ٻن نامور اديبن ڊاڪٽر علي رضا بهشتي ۽ ڊاڪٽر محمد بارانيءَ مرتب ڪيو آهي. پيش لفظ ڊاڪٽر محمد بارانيءَ لکيو آهي. ديوان بابت تفصيلي مقدمو ڊاڪٽر علي رضا بهشتي ۽ ڊاڪٽر محمد بارانيءَ گڏجي لکيو آهي، جنهن ۾ مير نصير خان ٽالپر جي زندگيءَ جي احوال سان گڏ تصنيفن ۽ ديوان بابت شرح يعني غزلن تي علم معاني، علم بيان، فصاحت ۽ بلاغت جي روشنيءَ ۾ بحث ڪيو ويو آهي، ان کانسواءِ حافظ شيرازي ۽ سعدي شيرازيءَ جي غزلن جي تتبع تي چيل مير نصير جي غزلن جي به نشاندهي ڪئي وئي آهي، مير نصير جي غزلن ۾ جتي به قرآني آيتن ۽ حديثن جو ذڪر آهي، انهن کي نمايان ڪري وضاحت ڪئي وئي آهي.
مير نصير خان ٽالپر جي هن فارسي ديوان ۾ غزل حروف تهجي الف- ب ترتيبوار رديفن مطابق رکيل آهن. ديوان ۾ ڪل 511 غزل آهن.
چار رنگي ٽائيٽل، ڊبل ڪرائون سائيز وارو 305 صفحن تي مشتمل هي فارسي ديوان، ايران جي شهر زاهدان جي هڪ مشهور يونيورسٽي ’دانشگاهه سيستان و بلوچستان مرڪز مطالعات شبه قاره و آسياي جنوبي‘ مان 2010ع ۾ شايع ٿيو، جنهن جي قيمت 45000 ريال ڄاڻايل آهي.
ايران مان شايع ٿيندڙ هن ديوان جو اصل نسخو ’پنجاب يونيورسٽي لاهور‘ ۾ موجود آهي.

ڪتاب - ڀاڱي جون ٻِيون داخلائون